Na gala participarán os galardoados Jacobo Paz Limia, na categoría de poesía, e Manuel Vilas López, na de xornalismo. Ademais, haberá unha actuación performativa de Nuria Vil, quen presentará a súa obra ‘desobediensia’.
O xurado destacou a obra Mariscadoras de Jacobo Paz Limia pola súa temática social e a forza das imaxes que retratan o traballo do mar dende unha voz feminina. Pola súa banda, Manuel Vilas López foi recoñecido polo seu reportaxe “Nin pirómano nin inocente: o eucalipto arde ben nun rural abandonado”, publicado en Galicia Pres, valorado polo xurado como unha análise orixinal e arriscada do papel dos eucaliptos nos incendios.
Manuel Vilas López é coordinador de Galiciapress dende 2018 e conta cunha ampla traxectoria no xornalismo, incluíndo postos directivos no Colexio Profesional de Xornalistas de Galicia e no Sindicato de Xornalistas de Galicia.
Jacobo Paz Limia, ademais de gañador do XIV Premio de Poesía Manuel López Ardeiro coa obra Kensington, ten máis de vinte anos de experiencia como guionista audiovisual, participando en programas como Atrápame se podes (Premio Iris 2024) e series como Saudade de ti.
Estes premios, dotados con 2.500 euros por categoría, nacen como homenaxe a José Gómez de la Cueva, coñecido como Johan Carballeira, político, poeta e xornalista bueués e alcalde ata o seu asasinato.
