O encontro, organizado por Galicia Suroeste con motivo do Día Internacional das Mulleres Rurais, recoñeceu o labor de Ortega e do grupo que puxo en marcha hai uns quince anos en Goián. O Grupo Cultural San Roquiño, que naceu da ilusión de facer películas, converteuse nunha iniciativa sen ánimo de lucro que reúne ata un cento de persoas e que creou sete filmes e numerosas curtametraxes.
A alcaldesa de Tomiño e presidenta de Galicia Suroeste, Sandra González, destacou o valor deste recoñecemento, sinalando que "Reme representa a ilusión e o compromiso de tantas mulleres que dedican o seu tempo a poñer en marcha iniciativas que enriquecen a vida dos seus lugares". Subliñou tamén a importancia de visibilizar estas achegas, xa que "as mulleres teñen un papel fundamental na vida cultural e asociativa do rural, pero ese traballo non sempre recibe a atención que merece".
“"As mulleres teñen un papel fundamental na vida cultural e asociativa do rural, pero ese traballo non sempre recibe a atención que merece. Este foro é unha oportunidade para agradecerlles a súa dedicación e para coñecer as historias que hai detrás de proxectos que significan tanto para a veciñanza."
A sexta edición do encontro reuniu representantes institucionais e homenaxeadas de concellos de Galicia Suroeste, con traxectorias vinculadas a diversos ámbitos. Durante a xornada proxectáronse pezas audiovisuais sobre as súas historias e deuse lectura ao Manifesto da Muller Rural Galega. Tamén se realizou un recoñecemento especial a Carmen Tellado, cociñeira do colexio de Pazos de Borbén.
O Concello de Tomiño felicitou a Reme Ortega por esta distinción, extensiva ao Grupo Cultural San Roquiño pola súa contribución a unha cultura aberta á participación veciñal.
