O colectivo manifestouse este xoves fronte ao edificio administrativo da Xunta en Ferrol para denunciar a "falta de diálogo" por parte do Goberno autonómico. A súa demanda céntrase no establecemento de compensacións económicas polas limitacións que afectan as súas propiedades desde a declaración do espazo como protexido.
“"Reclamamos diálogo, atención, compensación, que deixen de ignorarnos porque sabemos que temos dereitos e eles fan oídos xordos."
Ante o que consideran un "bloqueo administrativo", os propietarios anunciaron o inicio, este mesmo venres 24 de abril, dunha campaña de recollida de sinaturas. O obxectivo é impulsar unha Iniciativa Lexislativa Popular (ILP) que será rexistrada no Parlamento de Galicia.
A ILP require un mínimo de 2.500 sinaturas de cidadáns galegos para ser debatida na Cámara autonómica. As súas principais demandas inclúen a convocatoria inmediata dunha reunión prometida pola conselleira hai máis dun ano, a revisión do Plan Reitor de Uso e Xestión (PRUX), a implementación dun sistema estable de compensacións económicas directas e a creación de mecanismos de participación real para os propietarios na planificación do espazo.
Desde a entidade de propietarios subliñan que a súa proposta non cuestiona a protección das Fragas do Eume, senón que busca un modelo de conservación socialmente xusto que non recaia exclusivamente sobre as familias que levan xeracións xestionando estas terras.
