O executivo local de Cabanas, liderado polo popular Fernando Couce Rodríguez, fixo público un comunicado contundente para protexer o cadro de persoal do consistorio. Denuncian unha "estratexia de denigración, minusvaloración e desprezo" que, segundo afirman, os grupos da oposición (PSOE, BNG e Somos Cabanas) manteñen de forma reiterada cara aos traballadores públicos.
Segundo o texto difundido polo equipo de goberno, estas actitudes intensificáronse nos últimos meses, considerándoas un "intento desesperado" de atacar ao Partido Popular ante a "ausencia de argumentos" para criticar unha xestión municipal que, ao seu xuízo, "funciona e saca proxectos adiante".
O executivo local asegura ter recibido escritos de empregados municipais, tanto a título individual como colectivo, que poñen de manifesto os ataques sufridos, algúns deles producidos durante as sesións plenarias. Nestes escritos, os traballadores solicitan que se separe a esfera política da labor profesional dos funcionarios.
“"O goberno municipal do PP reitera a defensa dos traballadores públicos do consistorio, que realizan o seu traballo coa mellor dedicación posible e que non merecen un trato despectivo por parte dos grupos da oposición."
O alcalde, Fernando Couce, critica a "nefasta labor" da oposición e esíxelles que cesen no menosprezo á plantilla e comecen a realizar unha oposición "útil e construtiva". No comunicado, contrástase a situación actual coa vivida na lexislatura anterior, lembrando episodios como a cancelación da cea de Nadal de 2022 ou a ausencia de actos de despedida por xubilación, fronte á recuperación destes eventos e a recente aprobación unánime do convenio laboral cos sindicatos.
