A delegada de Ferrol, Martina Aneiros, deu conta hoxe da resolución destas axudas da Consellería de Medio Ambiente e Cambio Climático durante unha visita ao concello das Pontes, onde se está a acometer unha das actuacións financiadas.
No ámbito do Parque Natural das Fragas do Eume, concedéronse un total de 11 axudas: tres aos concellos de As Pontes, Cabanas e Pontedeume; sete a particulares; e unha á Asociación de Defensa Ambiental Grupo Naturalista Hábitat.
Aneiros visitou especificamente unha das actuacións financiadas por un particular, que recibiu unha achega de 10.000 euros para a rehabilitación dun hórreo situado en Pereiro de Abaixo, na parroquia de San Pedro do Eume.
Esta convocatoria de axudas, que contou cun crédito orzamentario de 1,8 millóns de euros este ano, dispón dunha liña específica para reservas da biosfera e outra para actuacións na Rede Natura 2000 e parques naturais. Esta segunda liña subvenciona a conservación e mellora da biodiversidade, a recuperación de elementos históricos e patrimoniais, e a creación de infraestruturas de xestión e ordenación de usos recreativos.
“"Trátase dunha medida coa que o Goberno galego pretende contribuír a deter e a inverter a perda da biodiversidade, a potenciar os servizos ecosistémicos e a conservar os hábitats e as paisaxes."
As Fragas do Eume, declaradas Parque Natural en 1997, abranguen máis de 9.000 hectáreas nos concellos de Cabanas, Pontedeume, A Capela, Monfero e As Pontes de García Rodríguez. Este espazo, cunha marcada influencia oceánica, representa unha das mostras máis importantes dos bosques sublitorais galegos e un dos poucos bosques atlánticos ben conservados de Europa. Dende o ano 2023, conta cun Plan Reitor de Uso e Xestión (PRUX) aprobado pola Xunta, que prevé un investimento de 8,5 millóns de euros para os seus 10 anos de vixencia.
