O suceso ocorreu sobre as 14:30 horas deste sábado, cando a Central de Emerxencias do 112 Galicia recibiu o aviso. A condutora implicada circulaba polo quilómetro 26,500 da N-651 en dirección a Betanzos.
Por causas que aínda se investigan, o turismo que guiaba perdeu o control e despistouse pola marxe dereita da calzada, impactando contra un gardarraíl e unha sinal de tráfico.
Debido ao impacto, a moza sufriu varias lesións, que en principio foron cualificadas como leves. Os servizos sanitarios do 061 desprazados ao lugar consideraron necesario o seu traslado ao hospital Arquitecto Marcide, que forma parte do Complexo Hospitalario Universitario de Ferrol (CHUF).
A alerta tamén mobilizou á Garda Civil de Tráfico e aos servizos de mantemento de estradas para asegurar a zona e restablecer a normalidade na circulación.
