Esta semana chega cargada de citas culturais e festivas en Cabanas. O xoves 5 de novembro, ás 12:30h, haberá teatro infantil coa obra Travesía unicornio no CEIP Eladia Mariño, unha actividade organizada polo Concello e a Deputación da Coruña dentro do Circuíto en Igualdade.
O venres 6, a partir das 20h, Tarde Piache organiza a presentación do libro “Usted debería saber. La historia secuestrada de la monarquía. 90 años con Franco”, de Manuel Monge, na Casa da Cultura. Paralelamente, ofrecerase un obradoiro de camisolas para nenos/as como servizo de conciliación.
Ás 21h dese mesmo venres comezarán as Festas de San Martiño de Porto, que incluirán unha degustación de polbo da Pulpería Landeira, seguida de verbena co Grupo Eureka e o Dúo Venus.
As festas continuarán o sábado 7 coas dianas e alboradas con gaiteiros, unha misa solemne ás 13:15h, fogos de artificio e sesión vermú co Dúo Maracuyá. A noite estará amenizada polo Grupo Jaque e o Dúo Maracuyá.
O domingo 8, a programación festiva inclúe misa solemne con procesión do Santo Patrón ás 13:15h e sesión vermú co Dúo Boreal. Pola tarde, ás 17h, celebrarase a Roga da Esfolla no Pavillón de Lavandeira, organizada pola Asociación de Mulleres Cabanas Rural, con música de Silbarda e merenda.
Ademais, o Punto Limpo móbil estará esta semana na Av. do Areal, no aparcadoiro do Día Oito. Tamén se informa dun cambio de data na excursión ao programa “En Compañía de Loli”, que se traslada ao xoves 12 por causas alleas.
Por outra banda, a ITV Agrícola visitará Cabanas os días xoves 3 e mércores 9 de decembro no Pavillón Municipal (Lavandeira). O horario será de 9h a 13:30h e de 15:15 a 18h. Para pedir cita previa, pódese chamar ao 981 92 80 80 ou visitar www.sycitv.com.
