O conselleiro de Cultura, Lingua e Xuventude, José López Campos, anunciou hoxe que a Xunta de Galicia vén de adxudicar por preto de 200.000 euros a segunda fase da restauración da ponte medieval de Fillaboa, no municipio pontevedrés de Salvaterra de Miño. A infraestrutura, de interese histórico e patrimonial, terá un prazo de execución previsto de seis meses.
Esta construción, de 75 metros de lonxitude e composta por catro bóvedas apuntadas, xa fora obxecto en 2015 dunha primeira intervención por parte do Goberno galego por valor de 117.000 euros para "resolver unha serie de patoloxías, resultado da erosión provocada polo paso do tempo e tamén polas fortes correntes do río Tea".
As novas obras completarán as "actuacións que lle eran necesarias para reparar o conxunto de danos co obxecto de garantir a súa estabilidade". Apúntase que se levarán a cabo, entre outras accións, a cimentación de piares, a colocación de tirantes de aceiro ou a reparación de gretas.
