A Unidade Cinolóxica de Ponteareas fixo historia este fin de semana ao proclamarse como o equipo de rescate máis destacado de Europa. No marco dos “XI Xogos Europeos de Policía e Bombeiros 2026”, cuxas probas caninas acolleu o propio municipio ponteareán, a unidade local alcanzou o cumio ao conseguir dúas medallas de ouro e unha de prata en disciplinas de máxima esixencia técnica e operativa.
Esta brillante actuación cobra aínda máis relevancia ao tratarse de tan só a segunda participación da Unidade Cinolóxica nuns Xogos Europeos. Cun historial tan novo nesta cita continental, o equipo ponteareán logrou situarse de inmediato na vangarda do salvamento internacional.
A esixencia do campionato quedou patente no desenvolvemento das probas. Segundo explicou o responsable da unidade local, Jesús Rodríguez, as probas contaron cunha “gran complexidade técnica”, cuxa mellor evidencia é que de as 15 medallas posibles en xogo só se entregaron 5 en total. A gran noticia para o municipio é que, de esas cinco únicas prezas concedidas, tres foron para Ponteareas, o que sitúa ao equipo de emerxencias ponteareán como líder absoluto do medalleiro.
Os binomios locais demostraron a súa superioridade operativa fronte a especialistas de todo o continente. Na modalidade de “Busca en cascallos”, celebrada nos terreos de Ribadetea, a guía Sonia xunto ao seu can Boby alzouse coa medalla de ouro na categoría feminina.
Pola súa banda, a disciplina de “Busca en grandes áreas”, desenvolvida nas inmediacións do Convento de Canedo, estivo dominada por completo por Ponteareas tanto en categoría feminina como masculina. A guía Josefa con Dana conseguiu o ouro feminino, mentres que Jesús Rodríguez co can Ares logrou a prata masculina.
Este resultado consolida a traxectoria internacional de Jesús Rodríguez e o can Ares, quen na súa primeira experiencia nuns Xogos Europeos, celebrados no ano 2024 na localidade portuguesa de Braga, xa demostraran o seu enorme potencial ao alzarse tamén coa segunda praza e, polo tanto, o subcampionato na proba de “Busca en grandes áreas”.
O tenente de alcaldesa e concelleiro de Emerxencias, Juan Carlos González, puxo en valor “a aposta estratéxica do concello pola posta en marcha desta unidade”. Engadiu que “estas tres medallas nunhas probas de tan alta esixencia técnica demostran que o esforzo e o adestramento constante dan os seus froitos, consolidando a Ponteareas como o líder indiscutible desta disciplina”.
A alcaldesa de Ponteareas, Nava Castro, amosou a súa máxima satisfacción e orgullo polo fito alcanzado, destacando que “é un orgullo inmenso ver como o nome de Ponteareas brilla no máis alto de Europa grazas ao traballo, a entrega e a excelencia da nosa Unidade Cinolóxica”. “Este éxito ratifica que o noso municipio conta con profesionais de primeiro nivel e sitúanos como un referente absoluto no ámbito internacional do salvamento”.
