O municipio consolídase como o único concello galego que participou nas tres edicións desta iniciativa da Xunta de Galicia e a Unión Europea para reter o talento local. Doce mozas e mozos completaron catro meses de prácticas remuneradas e 58 horas de formación especializada en habilidades sociolaborais e Intelixencia Artificial.
Ao acto de clausura asistiron María Isabel Couselo, directora territorial da Consellería de Cultura, Lingua e Xuventude en Pontevedra, xunto á alcaldesa, Nava Castro, e a concelleira de Emprego, Silvia Fernández. Nesta edición participaron doce persoas (6 mozos e 6 mozas) con diversos perfís profesionais, procedentes tanto de Ponteareas coma de municipios limítrofes. O proxecto, destinado a mozos inscritos no Sistema Nacional de Garantía Xuvenil, saldouse cun balance moi positivo coa inserción laboral inmediata de tres participantes ao remate do seu período formativo.
O programa articulouse en tres piares: estadías formativas de catro meses no tecido empresarial local; 58 horas de formación en competencias persoais e intelixencia artificial; e un itinerario de orientación personalizado. O Concello agradeceu a colaboración de firmas como Silvareira Servizos Forestais, Centro de Negocios Asergalicia, Consultoría Condado Paradanta, Algazara Home, Uniformes Elena Pérez, Ecocelta Galicia, Slab arquitectura de interiores e Fashion Forever-Liu Bazar.
María Isabel Couselo destacou a aposta de Ponteareas “por este proxecto, sendo o único concello de Galicia que foi beneficiario nas tres convocatorias”, e o compromiso da Xunta “por seguir apoiando iniciativas que unan o talento da nosa mocidade co tecido produtivo”. A alcaldesa Nava Castro subliñou que a iniciativa encaixa coa visión de futuro para Ponteareas, “unha vila na que a mocidade poida estudar, emprender, traballar e construír o seu proxecto de vida sen verse obrigada a marchar por falta de oportunidades”.
A concelleira de Emprego, Silvia Fernández Táboas, engadiu que ser o único concello beneficiario das tres edicións “amosa que estamos ante un goberno disposto a ofrecer oportunidades de inserción laboral á nosa cidadanía”. Ponteareas demostra así a súa capacidade para impulsar programas útiles e eficaces en colaboración coa Xunta de Galicia e o empresariado local, converténdose nun referente na formación e retención do talento xuvenil.
