Os xardíns da Xiralda acollerán mañá, ás 20:00 horas, o acto inaugural da décima edición da Feira do Libro de Ponteareas. O escritor novel local Anxo Rodríguez exercerá de pregoeiro. A feira poderá ser visitada dende mañá e ata o domingo 12 de xullo, organizada pola Federación de Libreiros de Galicia coa colaboración do Concello de Ponteareas, a Xunta de Galicia e a Deputación de Pontevedra.
No acto inaugural estarán presentes o director xeral de Cultura da Xunta de Galicia, Anxo Lorenzo; o deputado provincial, Pablo Castillo; representación da Federación de Libreiros de Galicia; e a alcaldesa, Nava Castro. Anxo Rodríguez, que vén de publicar a súa primeira novela, “La última carta a casa”, será o encargado de dar o pistoletazo de saída oficial á feira.
Esta feira destaca por acoller numerosas actividades como presentacións de libros, recitais ou teatro. O xoves, primeiro día da feira, a xornada comezará ás 18:00 horas cun obradoiro infantil titulado “Guía dos seres fantásticos que viven en Galiza sen que talvez o saibas”. A presentación oficial terá lugar ás 20:00 horas.
A actividade nas casetas das librarías comezará antes do acto inaugural. Ás 18:30 horas haberá catro sinaturas de libros. Destaca a do pregoeiro local Anxo Rodríguez coa súa obra “La última carta a casa” na caseta da libraría Sherwood. Nese mesmo horario, asinarán Isabel Porto con ¿Quién robó el tiempo?” na caseta da libraría Porto; Samuel Ferro con “Abismo bajo las luces” na caseta da libraría Ledo; e Alba López con “Nándinor”, “La leyenda de Noa” e “Glesea” na caseta da libraría Uróboros.
Ás 19:00 horas será a quenda para a presentación do libro “Nailía”, de Loli Rodríguez. Ás 20:30 horas asinará o seu libro “Ni paraiso ni mierdas” Ena Beisly, na caseta da libraría Porto. Tamén se presentará o libro ”Begoña Caamaño. Xornalismo para a cidadanía”, da xornalista e escritora María Xosé Porteiro, ás 21:00 horas.
