O Xefe Territorial de Educación en Pontevedra, César Pérez Ares, supervisou hoxe o inicio das obras de reforma integral da cuberta do IES Plurilingüe Pedra da Auga en Ponteareas. A actuación, que conta cun investimento autonómico de 380.000 euros, busca solucionar un problema histórico do centro e mellorar a eficiencia enerxética e o confort.
Os traballos consistirán na substitución de 1.700 metros cadrados de tellado, así como o cambio dalgunhas baixantes e canaletas. O obxectivo é corrixir deficiencias, evitar filtracións e humidades, e optimizar o illamento térmico do edificio, ofrecendo así unhas instalacións máis seguras e confortables para o alumnado e o profesorado.
Esta intervención é froito do traballo de coordinación entre o Concello de Ponteareas, representado pola alcaldesa Nava Castro, o concelleiro de Ensino Ricardo González, e a concelleira de Urbanismo Silvia Fernández, e a Consellería de Educación. O concelleiro Ricardo González destacou que a renovación resolverá "un problema importante do centro" e ofrecerá "unhas instalacións máis seguras, eficientes e confortables".
A alcaldesa Nava Castro agradeceu "a sensibilidade da Consellería de Educación" para atender esta demanda e puxo en valor a colaboración institucional para "impulsar investimentos que melloran os servizos públicos e a calidade das infraestruturas educativas".
Ademais, o xefe territorial César Pérez Ares confirmou a ampliación do cadro de persoal docente do instituto con dúas novas incorporacións, respondendo a unha solicitude do centro para reforzar a atención ao alumnado de cara ao vindeiro curso.
