A Deputación de Pontevedra aprobou unha achega de máis de 11.000 euros destinada ao Concello das Neves co obxectivo de equipar o miradoiro de San Nomedio para a observación astronómica. Esta actuación busca reforzar a vocación astronómica do espazo e fomentar a práctica do astroturismo.
O financiamento desta dotación de mobiliario urbano e equipamento provén do proxecto Visit Rio Minho Plus, financiado nun 75% con fondos FEDER. Esta iniciativa forma parte dun paquete de medidas levadas a cabo pola Deputación en colaboración co concello para mellorar a imaxe do destino turístico transfronteirizo Río Miño.
Ademais, no marco do mesmo proxecto Visit Rio Minho Plus, a Deputación de Pontevedra e o Concello das Neves colaboraron para obter o certificado de Paraxe Starlight para o miradoiro de San Nomedio, o cal foi concedido a principios deste ano. Esta certificación avala a calidade do ceo e da contorna para o astroturismo.
A Deputación está a impulsar o astroturismo como unha modalidade innovadora e sostible, enmarcada no produto turístico Baixo o Ceo das Rías Baixas. Esta aposta estratéxica busca consolidarse a longo prazo, máis aló de fenómenos puntuais previstos para o horizonte 2026-2028.
