O mes de xullo chega a O Carballiño cargado de propostas culturais e festivas. As concellarías de Turismo e Cultura deseñaron unha programación con preto de trinta actividades co obxectivo de dinamizar a vida na vila, atraer visitantes e consolidar a localidade como destino turístico durante o verán.
A axenda arranca este sábado co Entroido de Verán, un evento que gañou popularidade nos últimos anos. Este ano, quince carrozas percorrerán as rúas principais do centro a partir das oito da tarde. A celebración continuará na Praza Maior coa actuación da Orquestra La Noria en dous pases.
A programación cultural inclúe cine ao aire libre o domingo 12 na Praza Maior coa proxección da película Rondallas, dentro do Circuíto Provincial de Cine de Verán 2026. Tamén se celebrará a XVI edición de Cine de Flores, organizada polo Cine Club Carballiño, os días 14, 15 e 16 de xullo.
A música e o teatro terán protagonismo co monólogo Galego pode selo calquera, de Alberte Montes, o día 17 no Auditorio. O día 18 celebraranse a XVIII Festa da Palabra e as Festas do Carmen de Señorín e de Santa María de Longoseiros. A tradicional Romaría da Madalena será o 22 de xullo, seguida do Festival de Habaneras o 25.
Os máis pequenos poderán gozar do Festival de Títeres no Parque Municipal do 20 ao 23 de xullo. Posteriormente, do 27 ao 30, terá lugar a Semana Grande para Pequenos, con propostas como a Festa da Auga e a Festa Holly.
A Mostra de Vinos regresará os días 24, 25 e 26 de xullo, sumando este ano a participación dunha adega portuguesa. O broche final á programación porao grupo Burning co seu concerto a noite do 31 de xullo.
