O municipio ourensán acolle esta iniciativa que busca fomentar a participación cidadá nas doazóns de sangue durante os meses estivais. A unidade móbil de ADOS estará operativa en horario de 10:00 a 14:00 e de 16:00 a 21:00 horas, facilitando a colaboración dos veciños e veciñas.
A campaña "Un alento de vida" estenderase por máis de 170 concellos galegos ata finais de agosto, co obxectivo de recoller preto de 22.000 doazóns de sangue. ADOS lembra a necesidade diaria de 400 doazóns para abastecer os hospitais, unha cifra que se mantén crítica no verán pola mobilidade dos doantes habituais.
A Axencia subliña a importancia deste xesto solidario para ofrecer unha oportunidade de curación a moitos enfermos e agradece a implicación da corporación municipal e dos doantes do Carballiño. No 2025, o municipio rexistrou 551 doazóns, cunha taxa de 39 por cada 1.000 habitantes.
Calquera persoa maior de 18 anos, con máis de 50 quilos de peso e sen enfermidades transmisibles polo sangue pode participar. Para máis información, ADOS dispón do portal web ados.sergas.gal, redes sociais e o teléfono gratuíto 900 100 828.
