Este proxecto xorde tras a finalización da reordenación da Praza do Centenario e situarase na ampla área rectangular destinada a albergar unha zona de xogos infantís. A iniciativa busca ofrecer elementos de xogo distintos aos xa existentes noutras áreas recreativas do centro urbano, diversificando así a oferta para os nenos e nenas.

O novo parque contará cunha innovadora estrutura en forma de cúpula, da que colgarán diversos xogos de corda, redes, escaleiras, pontes e un tobogán. Ademais, incluirá unha hamaca, tirantes, unha randeeira tipo péndulo, unha roda xiratoria e unha estrutura de sendeiro de parkour. Pensando na inclusión, disporá tamén dunha randeeira con asento adaptado e asento para bebés, así como unha cunca xiratoria.

O período estimado para a execución das obras é de catro meses. O orzamento de licitación ascende a 212.990,14 euros, incluído o IVE. As empresas interesadas poderán presentar as súas ofertas a través do Sistema de Licitación Electrónica da Xunta de Galicia (SILEX) ata as 23:59 horas do 13 de maio.