A entidade, que cumpre tres décadas de traxectoria, recibiu o recoñecemento do presidente provincial, quen destacou a súa capacidade para combinar formación deportiva, competición e transmisión de valores. O club conta actualmente con arredor de 300 licenzas federativas.
Formoso estivo acompañado pola alcaldesa de Ribeira, Mariola Sampedro; o presidente do Natural Sport, José Francisco Agrelo; o concelleiro de Deportes, Álex Vidal; e o director deportivo do club, Juan Luis Martínez. Durante a visita, o presidente provincial recibiu un agasallo dunha deportista de 12 anos, Ainara Piñeiro, bronce europeo e campioa de España.
O presidente da Deputación subliñou o labor do club coa canteira e o papel das familias, persoal técnico e directivos. Destacou a importancia de apoiar os deportistas desde as primeiras etapas para facilitar o seu crecemento e competición ao máximo nivel.
A Deputación da Coruña colabora co Natural Sport na adquisición de material deportivo, dentro da súa política de apoio aos clubs e asociacións deportivas da provincia.
Fundado en 1996, o Natural Sport converteu Ribeira nun escenario habitual de competicións e encontros de taekwondo, consolidando unha sólida estrutura de formación desde as categorías de base ata a alta competición.
