A Deputación da Coruña colabora na organización da Mostra Internacional Mares da Fin do Mundo, un evento que conxuga cinema e cultura mariñeira e que se desenvolverá en Rianxo entre o 14 e o 18 de outubro. A deputada provincial Sol Agra participou na presentación oficial, xunto á tenente de alcalde, Ana Vidal Fungariño, e o presidente da Asociación Cultural Mares da Fin do Mundo, Marcos Gallego.
A mostra, organizada pola Asociación Cultural Mares da Fin do Mundo co apoio da Deputación da Coruña, busca achegar á cidadanía a riqueza dos mares e a importancia da protección dos ecosistemas mariños a través da cultura e do audiovisual. A deputada Sol Agra destacou o cinema documental como "unha ferramenta fundamental para denunciar, dar voz a realidades moitas veces invisibilizadas e xerar conciencia social", subliñando que "mostras como Mares da Fin do Mundo demostran que a cultura tamén é unha forma de reivindicación e compromiso co noso territorio".
A programación desta edición porá o foco na preservación das flotas de pesca artesanal e de baixura, consideradas unha expresión da soberanía alimentaria, do patrimonio marítimo–pesqueiro e un sinal de identidade dos pobos costeiros. A novena edición introduce novidades na estrutura de proxeccións, presentando un total de corenta filmes, tanto nacionais como internacionais, distribuídos en distintas seccións e actividades.
As proxeccións terán lugar no Auditorio de Rianxo e complementaranse con actividades paralelas noutras localizacións do municipio. Para asistir a calquera das actividades, será necesaria a inscrición previa a través do sitio web oficial da Mostra.
A Competición Oficial da IX Mostra Mares da Fin do Mundo contará con dezaséis curtametraxes documentais de diversas procedencias xeográficas. Manteranse os dous galardóns principais: o Premio do Público (trofeo "O Faro", dotado con 1.000 €) e o Premio á Mellor Película da Competición Oficial (trofeo "O Faro", con 2.000 €), este último outorgado por un xurado profesional. As obras, con subtítulos en galego, explorarán a realidade de comunidades costeiras globais dende perspectivas ecolóxicas, sociais, culturais e poéticas, en liña co compromiso da mostra co medio mariño e a sustentabilidade pesqueira.
