A iniciativa do BNG xorde tras as "reiteradas queixas" dos usuarios do campo de fútbol de Vista Alegre polo mal estado do céspede. Aínda que existe un proxecto para substituílo, a formación nacionalista considera que esta medida é insuficiente se non vai acompañada doutras actuacións necesarias para garantir o bo funcionamento das instalacións.

O grupo nacionalista subliña que o complexo de Vista Alegre é fundamental para centos de nenos e nenas da Escola de Fútbol Municipal e diversos equipos, polo que é crucial asegurar a súa correcta conservación e mellora. Entre as propostas prioritarias inclúense a adquisición de bancos móbiles para maior versatilidade e abrigo, a mellora dos vestiarios, a renovación da iluminación, a instalación de marcadores dixitais e a posible remodelación da cuberta das gradas do campo vello, que actualmente non é funcional en días de choiva.

Ademais, a moción do BNG tamén aborda a escaseza de aparcamento na zona, propoñendo habilitar novas prazas nas inmediacións do complexo deportivo. A formación tamén sinala deficiencias noutras instalacións, como o pavillón de Valiño, onde son habituais as denuncias por filtracións de auga na pista e a falta de iluminación no camiño de acceso.

A través desta moción, o BNG insta ao Goberno local a incluír un plan de mantemento periódico no proxecto de substitución do céspede e a acometer as melloras necesarias en Vista Alegre. A portavoz do Bloque recalcou que "todas estas actuacións deben ter como prioridade garantir unhas condicións axeitadas para a práctica deportiva da infancia e da mocidade do concello".