O encontro 'Experiencias BoViño', celebrado no LAB Barbanza da localidade coruñesa de Boiro, congregou a expertos do sector vitivinícola, da hostalaría e do turismo co obxectivo de crear sinerxías, establecer novas conexións e explorar oportunidades de colaboración arredor dun sector con forte arraigo territorial.
Esta iniciativa, promovida polo Concello de Boiro e a Deputación da Coruña, busca pór en valor o patrimonio vitivinícola da comarca, dar visibilidade aos viños locais e fortalecer a relación entre adegas, profesionais da restauración, proxectos turísticos e emprendedores.
O alcalde, José Ramón Romero, e a deputada provincial de Industria, Emprego e Política Demográfica, Rosa Ana García, destacaron a importancia de apoiar iniciativas que unen produto, territorio, cultura empresarial e talento local. García subliñou que 'o sector vitivinícola é un bo exemplo de como a tradición pode transformarse en oportunidade cando se combina con innovación, profesionalización e capacidade emprendedora'.
A deputada tamén resaltou o papel do LAB Barbanza como un espazo clave para o emprendemento, que axuda a crear sinerxías e oportunidades para novas iniciativas empresariais, mesmo fóra dos grandes núcleos urbanos. Esta colaboración enmárcase na estratexia da Deputación de apoio ao emprendemento e á dinamización económica local a través da Rede Provincial de Coworking, que conta con doce espazos especializados na provincia.
