A operación, denominada Besteiros, comezou tras detectarse a desaparición continuada de reses en diversas zonas de pasto da comarca. Os implicados, veciños de Boiro, Caldas de Reis, Barro e Meis, están sendo investigados por delitos de furto, receptación e maltrato animal con resultado de lesións graves e morte.

Segundo as pescudas, o grupo actuaba de forma coordinada, roubando os animais e introducíndoos no circuíto de venda a través de membros dunha asociación gandeira. Para dificultar a súa identificación e evitar que fosen recoñecidos polos seus lexítimos propietarios, alteraban as marcas das orellas dos cabalos, practicando novas muescas sobre as orixinais sen ningún tipo de control veterinario, o que comprometía o benestar dos animais e entorpecía o seu rastrexo.

Durante a investigación, os axentes confirmaron tamén a morte de cinco cabalos por impactos de arma de fogo. No operativo, interviñéronse cinco escopetas de caza que, presuntamente, foran utilizadas por un dos investigados para efectuar os disparos.

A operación culminou coa recuperación e devolución das reses aos seus propietarios nos municipios de Boiro, Porto do Son e Lousame. Os cinco detidos quedaron en liberdade tras declarar nas dependencias da Garda Civil de Boiro, e as dilixencias xa foron remitidas ao xulgado de garda de Ribeira.