A presentación da tradución, realizada polo profesor Laureano Alonso Alvarez, terá lugar o vindeiro luns, 16 de novembro, ás 20:00 horas na Sala Municipal de Exposicións no Edificio "Francisco Sánchez" de Tui. A data coincide co 403 aniversario do falecemento de Sánchez na cidade francesa de Tolosa.
Esta obra forma parte de Opera Medica (Toulouse, 1636), unha edición póstuma das súas obras que inclúe tratados de Medicina e outros traballos menores como "De Longitudine et Brevitate Vitae liber" e "In Librum Aristotelis Physiognomicon, commentarius", ademais da coñecida Quod Nihil Scitur.
O labor de tradución, iniciado polo profesor Alonso en anos anteriores, busca difundir a figura e obra de Francisco Sánchez, considerado un dos grandes pensadores galegos cuxo pensamento segue sendo de actualidade.
No ano 2023 traduciuse ao galego a súa obra principal, Quod nihil scitur (1581), e posteriormente Carmen de cometa (1576) e "Libro sobre a duración e brevidade da vida" (2025).
A concelleira de Ensino, Cultura e Mocidade, Sonsoles Vicente Solla, destacou que esta publicación contribuirá á difusión do pensamento de Francisco Sánchez, reafirmando o orgullo de pertenza a Tui, cidade onde naceu e viviu a súa infancia.
Francisco Sánchez, coñecido como "O escéptico" ou "O Tudense", foi un pensador polifacético que naceu en Tui posiblemente en 1550. A súa familia, de ascendencia xudía, tivo que fuxir a Bordeos, onde continuou a súa formación antes de instalarse en Tolosa (Francia), onde exerceu como médico e profesor universitario. Faleceu en Tolosa o 16 de novembro de 1623.
