O municipio de Tui vén de ser galardoado con 3 flores de honra no certame Vilas en Flor, cuxa gala tivo lugar onte en Salceda de Caselas. O alcalde, Enrique Cabaleiro, recolleu a distinción, que supón un recoñecemento ao traballo municipal e eleva a cualificación de Tui de 2 a 3 flores.
O xurado destacou as recentes intervencións na Praza da Fromista, Praza da Armada e na contorna do mercado de San Antonio, valorando as súas "actuacións paisaxísticas e arquitectónicas axeitadas á contorna, peonizando a contorna das actuacións das prazas". Tamén se sinalaron as melloras nas rúas Ourense e Augusto González Besada, e o proxecto no paseo da Corredoira, como "sinais da boa dirección que leva a xestión do municipio". A restauración do horreo da finca Patazumba, declarado BIC, tamén foi posta en valor.
A mellora dos accesos á cidade, co seu "importante" impacto paisaxístico e visual, e a recuperación de sendas fluviais como a do Furnia, Caselas, do Miño e a que se executa dende a Ponte Internacional ata o límite con Tomiño, foron outros puntos valorados polo xurado.
Ademais, o xurado sinalou a presenza de exemplares de árbores destacadas como cedros e a "poda de proceso cunha boa praxe". Tamén se valoraron as actuacións para a substitución de lámpadas por luminarias led, a compostaxe de residuos e a plantación de especies de baixo consumo hídrico. Concluíron destacando "o proxecto a futuro, e sobre todo a enerxía e ilusión" transmitida polos representantes do Concello.
O programa Vilas en Flor Galicia busca recoñecer o compromiso dos concellos coa mellora dos seus espazos verdes e a calidade de vida da veciñanza a través de iniciativas ambientais e de xestión sostible.
