O Concello de Tui, a través da Concellería de Igualdade, puxo en marcha unha nova programación de obradoiros educativos co obxectivo de promover a igualdade entre mulleres e homes, fomentar a corresponsabilidade e impulsar modelos de masculinidade igualitarios. Esta iniciativa desenvólvese no marco do Plan Corresponsables, promovido polo Ministerio de Igualdade do Goberno de España e cofinanciado pola Xunta de Galicia. Espérase a participación de arredor de 990 alumnos e alumnas de diferentes etapas educativas.
As actividades, que comezaron o luns 26 de outubro e se estenderán durante novembro, están adaptadas ás diferentes idades. A través de metodoloxías participativas, o alumnado reflexionará sobre os roles e estereotipos de xénero, as relacións afectivas saudables e respectuosas, e contribuirá á prevención das desigualdades e das violencias machistas.
En Educación Primaria, os máis pequenos (1º a 4º) participarán na «Xincana da Corresponsabilidade», unha proposta lúdica sobre tarefas domésticas e coidados. Os de 5º e 6º abordarán no obradoiro «Relacións igualitarias, bo trato e masculinidades corresponsables» os estereotipos de xénero, a expresión de emocións e a construción de relacións baseadas no respecto e a empatía.
Nos institutos IES San Paio e IES Indalecio Pérez Tizón, o profesor de Filosofía Pepe Cabido impartirá sesións dirixidas á mocidade para reflexionar sobre os modelos tradicionais de masculinidade, os estereotipos e a necesidade de relacións igualitarias e libres de violencia.
A concelleira de Igualdade, Ana Núñez, destacou a importancia de "educar en igualdade desde a infancia para construír unha sociedade máis xusta", subliñando que "as tarefas domésticas e os coidados son responsabilidade de todas as persoas". Tamén sinalou que estes obradoiros "queremos ofrecer á nosa mocidade ferramentas para identificar e cuestionar os estereotipos de xénero" e que "a educación é unha das ferramentas máis importantes que temos para previr as desigualdades e as violencias machistas".
Con esta programación, o Concello de Tui reforza o seu compromiso coa educación e a sensibilización para avanzar cara a unha sociedade máis igualitaria, promovendo valores como a cooperación, o respecto e a responsabilidade compartida.
