O Concello de Cedeira vén de editar un folleto de man co obxectivo de divulgar os recursos de información e atención especializada en casos de violencia contra a muller. Esta publicación, de tamaño reducido para facilitar o seu transporte, inclúe números de teléfono, páxinas web e aplicacións de interese baixo a lema “non estás soa”.
Imprimiéronse 1.000 exemplares deste folleto, que anima tanto ás vítimas de violencia contra a muller como a calquera persoa que coñeza ou sospeite dunha situación de violencia a buscar axuda. A guía detalla teléfonos de urxencias, datos de contacto dos Centros de Información á Muller de Ortigueira e Ferrol, e servizos dispoñibles as 24 horas.
Entre os recursos que se poden atopar na publicación figuran o Centro de Crise de Ferrol e o servizo 016 do Goberno central. Ademais, inclúe accesos mediante código QR á web da Delegación do Goberno dedicada á materia e á aplicación Alertcorps das forzas de seguridade, que ofrece diversas funcionalidades para reforzar a seguridade das mulleres.
Os folletos, que dobrados miden 7,4×10,4 cm, están xa á disposición do público en dependencias municipais como o propio Concello de Cedeira, o Centro de Saúde, os Servizos Sociais, as oficinas da Policía Local e o posto da Garda Civil, así como noutras instalacións públicas.
