O Concello de Tomiño converteu as prazas do Seixo e da Mina en novos xardíns que renden homenaxe á forte tradición viveirista do municipio. A iniciativa busca crear espazos públicos máis verdes, atractivos e coidados, incorporando máis de 20 variedades de plantas seleccionadas pola súa resistencia e beleza.
Na Praza do Seixo, deseñáronse 18 parterres onde 19 especies vexetais se distribúen en franxas de cores e texturas que evocan a organización da produción nos viveiros. Esta intervención busca trasladar ao corazón de Tomiño unha paisaxe que forma parte da identidade e da economía local, prometendo un xardín en constante cambio coas floracións estacionais.
Pola súa banda, a Praza da Mina foi revitalizada coa plantación de 170 exemplares de ceanothus, hortensias e salvias. A disposición destas plantas, máis naturalista, complementa o xacarandá xa existente no espazo. A elección de especies con baixo consumo hídrico e a instalación dun sistema de rega por goteo son medidas clave para optimizar o uso da auga e facilitar o mantemento.
“"Tomiño é unha potencia viveirista e queríamos que esa identidade tamén estivese presente nas nosas prazas. Seguimos co iniciado no Cultivando Paisaxes, nas rotondas e espazos sobrantes de estradas do noso concello."
O desenvolvemento deste proxecto paisaxístico contou coa colaboración da viveirista Sinda Dávila, e as plantas empregadas proceden de viveiros do propio concello, reforzando así o apoio ao tecido empresarial local.
