O Concello de Tomiño vén de presentar alegacións ao proxecto da nova concesión de transporte público da Xunta de Galicia. O goberno municipal critica que a proposta elimina conexións existentes nas parroquias do interior e non resolve as dificultades para desprazarse a Vigo, aos hospitais ou á universidade, lamentando que non se atendesen as demandas trasladadas xa en outubro do ano pasado.
O retroceso máis grave afecta a parroquias como Taborda, Piñeiro e Sobrada de Arriba, xa que o novo deseño elimina os servizos actuais. Ademais, Santa María de Tebra, San Salvador de Tebra e Vilameán seguen sen unha ruta regular que as conecte co núcleo municipal.
A proposta tampouco mellora as viaxes máis habituais fóra do municipio. A liña semidirecta a Vigo prevé unha viaxe de hora e media, con catro saídas cara á cidade entre as 05:30 e as 08:30 horas. Para chegar ao Hospital Álvaro Cunqueiro, o traxecto estímase nunha hora e corenta minutos, pasando antes pola estación intermodal de Vigo, sen ofrecer conexión directa cos hospitais nin servizo específico para as parroquias de Tebra.
“"Se unha liña semidirecta tarda hora e media e unha persoa ten que pasar polo centro de Vigo para chegar ao hospital, este proxecto non está pensado para os desprazamentos reais da veciñanza. E é aínda máis grave que Taborda, Piñeiro e Sobrada de Arriba perdan as conexións que xa teñen."
Nas alegacións, o Concello tamén advirte da falta de autobuses nas horas de maior demanda, das longas esperas os domingos e dun regreso tardío desde o campus universitario do CUVI. Súmanse a estas carencias a ausencia dun reforzo do transporte interior os mércores, día de mercado, e o prezo previsto para desprazamentos curtos entre parroquias e o Seixo.
“"Insistimos en que o persoal responsable da planificación veña a Tomiño e percorra o territorio. É o mellor xeito de comprender as distancias, a dispersión das nosas quince parroquias e os desprazamentos que a veciñanza precisa facer cada día."
