O Concello de Tomiño deu un novo paso na conservación e posta en valor da súa historia municipal coa organización de 602 unidades documentais e a descrición de 2.669 rexistros do seu Arquivo Municipal, correspondentes ao período entre 1987 e 2025. Este proxecto, desenvolvido co apoio da consultora UNAYTA, ofrece unha panorámica da evolución administrativa, territorial e social do municipio.
A alcaldesa, Sandra González, destacou que o arquivo "garda moito máis que expedientes administrativos: nel está a historia de como fomos medrando, dos servizos que se puxeron en marcha e da vida das nosas parroquias". Engadiu que "coidar esta documentación é tamén coidar unha memoria compartida que debemos conservar e transmitir ás xeracións que veñen".
Os rexistros descritos inclúen documentos sobre a actividade diaria da Administración local, como sesións do Pleno, decretos da Alcaldía, contratación, xestión económica, planeamento urbanístico, licenzas de obras, apertura de rúas, abastecemento de auga e instalacións municipais. Tamén recollen aspectos da vida social, como padrón municipal, festexos, cultura, deporte, educación, asistencia social, emprego, turismo, medio ambiente ou protección civil.
González tamén salientou a utilidade do traballo para o funcionamento do Concello, xa que "ter a documentación ben organizada facilita a súa consulta e axúdanos a responder mellor ás necesidades da veciñanza". Sinalou que é un labor "pouco visible, pero necesario para unha Administración máis áxil".
O proxecto implicou a revisión e acondicionamento dos expedientes, a clasificación e descrición da documentación conforme aos criterios normalizados NOGADA e ISAD(G), e a instalación definitiva das unidades no depósito municipal. Ademais, optimizouse o espazo dispoñible e melloraron as condicións de conservación.
O traballo realizado establece unha folla de ruta para continuar co tratamento da documentación pendente, especialmente nas áreas de Urbanismo e Facenda, e avanzar na dixitalización dos fondos máis antigos. Con esta actuación, Tomiño consolida un Arquivo Municipal máis ordenado, accesible e preparado para o futuro.
