Trátase de dous contratos independentes. Un deles, cun orzamento base de licitación de 95.540 euros, destínase ao centro de saúde Rosalía de Castro, mentres que o segundo, cun orzamento de 150.000 euros, é para o Taboada Leal.
As empresas interesadas teñen de prazo para enviar as súas ofertas ata o 2 de novembro ás 14:00 horas para a actuación no centro de saúde Rosalía de Castro, e ata o 10 de novembro á mesma hora para o Taboada Leal.
No centro de saúde Rosalía de Castro, a actuación prevé a substitución do sistema actual de produción de auga quente para a calefacción e auga sanitaria por unha nova central térmica de condensación de alta eficiencia enerxética. Os traballos incluirán a retirada da caldeira existente, a adaptación das conexións e a reforma da sala de caldeiras. Ademais, renovarase o sistema de regulación e control, integrándoo na plataforma corporativa Niágara da área sanitaria de Vigo. Espérase mellorar o rendemento enerxético, reducir o consumo de gas natural e os custos de mantemento.
Pola súa banda, no centro de saúde Taboada Leal substituirase o sistema de produción de auga fría destinado á climatización por dous novos equipos de alta eficiencia enerxética. Estas dúas arrefriadoras aire-auga conectaranse para funcionar en cascada, permitindo operar de maneira independente ou simultánea segundo a demanda. A actuación tamén inclúe a retirada do equipo actual e a adaptación das instalacións.
Con estas renovacións búscase mellorar o rendemento enerxético, reducir custos de explotación e mantemento e garantir condicións axeitadas de climatización nas distintas áreas asistenciais e administrativas de ambos os centros.
