A localidade do Rosal xa prepara unha das citas máis esperadas do Nadal, o Mercado de Nadal, un espazo dedicado á artesanía, o deseño e os produtos de proximidade. O Concello abrirá o prazo de inscrición para participar nesta iniciativa o venres 13 de novembro ás 09:00 horas, convertendo o salón de exposicións municipal nun punto de encontro entre creadores e veciñanza.
O mercado terá lugar os días 4, 5 e 6 de decembro, e contará con 16 postos que ofrecerán ilustración, fotografía, deseño gráfico, xoguetes, roupa, complementos e outras creacións artesanais. Tamén haberá espazo para produtos gastronómicos como mel, queixos, marmeladas, turróns ou repostería.
A iniciativa está aberta a asociacións sen ánimo de lucro, persoas artesás, artistas, creadoras e produtoras gastronómicas, co obxectivo de que poidan dar a coñecer o seu traballo, achegar os seus produtos ao público e fomentar un consumo máis próximo e consciente.
“"O Nadal é un momento no que facemos moitos agasallos e queremos convidar a pensar tamén no que hai detrás de cada compra. Escoller unha creación artesanal ou un produto de proximidade é unha maneira de apoiar directamente o talento, o esforzo e a actividade económica da nosa contorna."
“"o mercado permite dar a coñecer pequenos proxectos, chegar a novos públicos e establecer un contacto directo coas persoas consumidoras, algo especialmente valioso para quen desenvolve a súa actividade a pequena escala."
As persoas interesadas en participar poderán presentar a súa solicitude ata o venres 20 de novembro. O trámite pode realizarse presencialmente no Rexistro do Concello (de 09:00 a 14:00 horas) ou a través da sede electrónica municipal. A selección farase por orde de entrada das solicitudes, cun máximo dun posto por participante. Cada expositor deberá encargarse da montaxe e decoración do seu espazo.
O Mercado de Nadal abrirá o venres 4 de decembro de 17:00 a 21:00 horas. O sábado 5 e o domingo 6, o horario será de 11:00 a 14:00 e de 17:00 a 21:00 horas. As bases completas están dispoñibles na web municipal.
