A iniciativa xorde da necesidade de atender as demandas das persoas coidadoras, que a miúdo enfrontan sobrecarga, dificultades emocionais e dúbidas sobre os coidados e recursos dispoñibles.
O programa consta de 12 sesións impartidas por profesionais de psicoloxía, avogacía, traballo social, fisioterapia, terapia ocupacional e enfermaría. Abordaranse temas como a promoción da autonomía, a atención sanitaria no domicilio, a xestión emocional, a comunicación, os aspectos legais e os dereitos dos coidadores.
Entre os contidos previstos figuran os motivos e consecuencias do coidado, as patoloxías da dependencia, os recursos comunitarios, a aceptación, a identidade familiar, a atención sanitaria domiciliaria, a comunicación eficaz, a xestión emocional, os aspectos legais e os dereitos dos coidadores, ademais dunha escola de costas e unha saída cultural.
A iniciativa está aberta a todas as persoas coidadoras informais de maiores dependentes, non só aquelas que coidan de familiares con demencia. Terán prioridade os veciños de Tomiño, e se quedan prazas, poderán participar profesionais do Servizo de Axuda no Fogar (SAF).
As sesións comezarán o luns 21 de setembro de 2026 e celebraranse os luns e mércores, de 10:30 a 12:00 horas, no Espazo Isaura Gómez.
As persoas interesadas poden obter máis información e inscribirse a través do correo psico.bea@afaga.com ou no teléfono 691 396 143.
Con este programa, o Concello de Tomiño e AFAGA buscan ofrecer un espazo de acompañamento, formación e apoio, promovendo o benestar e o autocuidado das persoas coidadoras.
