A localidade de A Guarda acolle este venres, 21 de agosto, o concerto Xuntos pola Música, unha homenaxe ao recoñecido artista galego Juan Pardo. A actuación, que terá lugar na Alameda ás 22:30 horas, forma parte do programa provincial +Música da Deputación de Pontevedra.
O espectáculo Xuntos pola Música conta coa participación de profesionais como Lys Pardo, filla de Juan Pardo, e o cantante Antonio Barros, ademais de Fernando Calderón e iAlma. O grupo busca dar unha visión contemporánea e emocionante do repertorio de Juan Pardo, incluíndo tamén poemas musicados de autores como Eduardo Pondal e Ramón Cabanillas.
Este concerto é unha das 93 actuacións programadas en 58 concellos de menos de 50.000 habitantes da provincia de Pontevedra, grazas ao programa +Música. Cun orzamento de 700.000 euros, a Deputación apoia a programación cultural local, impulsa a lingua e a cultura galegas e fomenta o turismo cultural na provincia.
