O programa +Música da Deputación de Pontevedra chega este sábado á vila de Tui coas actuacións de Fanfarria Taquikardia e Mekanika Rolling Band. Os concertos terán lugar na rúa Compostela, no marco da programación da Festa do Miño, e comezarán ás 21:30 horas.
Fanfarria Taquikardia, formada a mediados de 2011, define o seu estilo polo folk centroeuropeo, ritmos balcánicos e influencias klezmer, con toques de jazz e bandas sonoras. Pola súa banda, Mekanika Rolling Band é un grupo de animación de rúa e charanga coñecido polos seus espectáculos enerxéticos que combinan música en vivo con efectos visuais.
Ambos os concertos forman parte das 93 actuacións que +Música ofrecerá entre maio e decembro en 58 concellos de menos de 50.000 habitantes da provincia. Este programa conta cun orzamento de 700.000 euros, co que a Deputación apoia a programación cultural e o fomento da lingua e cultura galegas, buscando a descentralización da cultura e a difusión de actos de calidade por toda a xeografía provincial.
