A proposta, cualificada por Martínez como “variada, ambiciosa e pensada para dar cabida a todo tipo de públicos”, busca consolidar a aposta por disciplinas como o cine, o teatro e a música, ao tempo que introduce novidades centradas na literatura e a memoria colectiva.
Entre as iniciativas máis destacadas atópanse as xornadas pola memoria histórica, que culminarán cunha homenaxe ao escritor noiés Maxi Olariaga, falecido en 2018, o sábado 17 de maio ás 12.00 horas. Tamén se levará a cabo unha xornada de etnografría popular na Casa da Cultura Avilés de Taramancos durante o mes de maio.
“"Trátase de iniciativas que nos permiten mirar o noso pasado, recoñecer as persoas que formaron parte del e reforzar a nosa identidade como vila."
A literatura terá un papel central coa recuperación da Feira do Libro de Noia, que se celebrará os días 22, 23 e 24 de maio. Ademais, a programación incluirá a presentación de dúas obras literarias e a conmemoración do Día das Letras Galegas. A concelleira subliñou que “recuperar esta feira é unha débeda que tiñamos coa cidadanía e co sector cultural”.
No ámbito das artes escénicas, Noia acollerá a obra Golpe a golpe, verso a verso, protagonizada por Ismael Serrano. O humor tamén terá o seu espazo coa segunda edición do Festival de Humor Pedro Brandariz, un evento que rende tributo a un humorista “moi ligado á nosa vila”.
