A iniciativa busca reforzar o compromiso colectivo coa hixiene municipal e a prevención de incendios, un risco que aumenta significativamente durante os meses estivais. Nos próximos días, os veciños de Noia atoparán anuncios informativos distribuídos por todo o municipio, que recordan as normas básicas de convivencia e responsabilidade.
Entre as directrices destacadas, sublíñase a prohibición de depositar lixo na vía pública fóra dos puntos autorizados e a importancia de utilizar o Punto Limpo municipal, que permanece plenamente operativo para a correcta xestión de residuos. Ademais, o Concello recorda a existencia dun servizo gratuíto de recollida de enseres voluminosos, dispoñible previa solicitude, para facilitar a eliminación adecuada deste tipo de obxectos.
No ámbito da prevención, a campaña fai fincapé na obrigatoriedade de manter os terreos limpos, podados e en condicións axeitadas. Esta medida é crucial nesta época do ano para evitar incendios forestais e protexer tanto as vivendas como as infraestruturas. O incumprimento destas normativas pode carrexar sancións económicas, segundo o establecido nas ordenanzas municipais vixentes.
“"Coa chegada do verán é especialmente importante extremar o coidado do noso entorno. Pequenos xestos, como manter os terreos limpos ou facer un uso correcto dos residuos, teñen un impacto directo na prevención de incendios. Non se trata só de cumprir a normativa, senón de asumir un compromiso colectivo co noso municipio. Entre todas e todos podemos facer de Noia un lugar máis limpo e coidado."
Desde o Concello, faise un chamamento ao civismo, á responsabilidade e ao compromiso da veciñanza, co obxectivo de seguir construíndo un Noia mellor para vivir.
