Baixo o lema Proxecto Zernadas´27, o municipio aposta por homenaxear a este precursor do galeguismo. O alcalde de Lousame, Esteban Ares, destaca o papel "heroico" de Zernadas na defensa da identidade galega e do uso do idioma no século XVIII, sinalando que "probablemente é a figura máis importante do noso Concello" e "merece ser recoñecido a nivel autonómico, non esquecido".

A candidatura de Zernadas compite con outros nomes recoñecidos para o Día das Letras Galegas de 2027, como Xosé Neira Vilas. O rexedor lousamián suxire que o ano 2028 podería ser axeitado para Neira Vilas ao cumprirse cen anos do seu nacemento, mentres que o 2027 representa "o ano perfecto para pechar a efeméride de Zernadas e premialo". Ares tamén sinala que esta conmemoración "poría a Lousame no mapa de Galicia a nivel cultural".

A campaña conta cun "apoio unánime a nivel político, social, cultural e veciñal", segundo o alcalde. O Goberno local destinou fondos orzamentarios para presentar iniciativas nas parroquias que amosen o valor da vida e obra de Zernadas. Ademais, realizáronse actos institucionais con conferencias de profesionais como Xulio Pardo de Neira e Xosé Manuel Rivas Troitiño, e mantivéronse reunións con académicos da Real Academia Galega (RAG).

Como colofón ás actividades, o Concello de Lousame organizará mañá en Fruíme a Festa do Galego 2027: todos con Zernadas. A xornada incluirá unha andaina de 5 quilómetros con láminas informativas sobre o autor, actuacións musicais, unha ofrenda floral diante do busto de Zernadas e un xantar popular organizado pola Asociación de Veciños Zernadas de Castro de Fruíme. O acto está aberto á participación de veciños de todos os concellos.