O presidente galego, Alfonso Rueda, comunicou a medida este mércores no Parlamento de Galicia. O obxectivo é que este novo límite de idade, que ata o momento se situaba nos 36 anos, poida aplicarse xa na próxima convocatoria, prevista para 2027. A convocatoria actual mantén o prazo de solicitude aberto ata o vindeiro 30 de outubro.
Esta liña de axudas permite ao Executivo autonómico avalar ata o 20% do prezo da vivenda. Deste xeito, búscase facilitar que a hipoteca poida cubrir o 100% do importe, permitindo así que os mozos, agora menores de 45 anos, poidan adquirir un inmoble malia non dispoñer dos aforros suficientes para cubrir a porcentaxe que as entidades bancarias non financian.
A resposta de Rueda produciuse tras unha pregunta do voceiro parlamentario do PSdeG, José Ramón Gómez Besteiro, quen instou á Xunta a "blindar a protección permanente" da vivenda pública para previr a "especulación". O mandatario autonómico defendeu as medidas do seu Goberno en materia de vivenda, lembrando que a normativa xa foi modificada para garantir dita protección en toda a vivenda pública.
Rueda tamén criticou a xestión do Ministerio de Vivenda, acusándoo de limitarse a "anuncios nos medios e nada máis" e de "facer caixa" con Galicia a través da venda de propiedades da Sareb. Pola súa banda, Besteiro sostivo que Galicia se atopa nunha "emerxencia social" pola dificultade de acceso á vivenda e defendeu as actuacións do Goberno central, cuestionando a proxección de vivendas públicas anunciadas pola Xunta.
O líder dos populares galegos invitou a Besteiro a "ir a ver as vivendas que se están construíndo" e cuestionou a percepción do Goberno central por parte daqueles que non poden permitirse unha vivenda e ven "que se abren determinadas caixas fortes" de quen "nos daban leccións de honradez".
