A normativa, que supuxo un cambio de modelo cara á autonomía da vontade, está a xerar efectos non desexados en ámbitos como as prestacións, os apoios profesionais e os ingresos involuntarios, segundo as conclusións dun encontro celebrado esta semana.
O decano do Colegio Notarial de Galicia, José María Graíño, destacou a importancia de revisar tanto as achegas da Lei 8/21 como as deficiencias detectadas na súa vixencia.
Un dos puntos centrais foi a figura da guarda de feito, o apoio informal prestado por familiares. A fiscal coordinadora de Persoas con Discapacidade e Maiores, María José Segarra, advertiu da falta de concienciación das administracións e empresas, así como do exceso de trámites.
Representantes de entidades como Fademga Plena Inclusión Galicia e a asociación Líber criticaron que a lei non ten en conta a diversidade do colectivo, especialmente na discapacidade intelectual, e que non contempla axudas económicas para financiar os servizos de apoio, o que supón unha carga para as familias.
Tamén sinalaron que a aplicación da norma pola Seguridade Social e a Axencia Tributaria está a provocar a perda de prestacións e beneficios fiscais. A directora da Fundación Aequitas, Almudena Castro Girona, resumiu o desaxuste afirmando que "a ningún xurista lle pode caber na cabeza que unha administración prive a alguén dun dereito adquirido".
Outro punto crítico foron os ingresos involuntarios psiquiátricos ou residenciais. Denunciouse a desprotección xurídica neste ámbito e censurouse que a privación de liberdade se regule nun só artigo da Lei de Axuizamento Civil, sen normas como a asistencia letrada previa.
As xornadas tamén abordaron a función notarial para dar forma xurídica á vontade da persoa e garantir o exercicio dos seus dereitos. Os expertos coincidiron na necesidade de evitar solucións legais "estándar" e apostar por "traxes a medida" para cada persoa e discapacidade.
