A subdirectora xeral de Estilos de Vida Saudable da Consellería de Sanidade, Sagrario Pérez, participou esta semana no Encontro de Programas de Promoción da Saúde no Traballo en España, celebrado en Menorca. O evento reuniu a representantes das comunidades autónomas para compartir experiencias e impulsar novas liñas de colaboración.
Galicia expuxo un modelo de saúde que vai máis alá da prevención tradicional de riscos laborais. A proposta céntrase en converter os centros de traballo en contornas que faciliten hábitos saudables e contribúan á prevención das enfermidades crónicas.
Esta iniciativa, co-liderada polos departamentos de Sanidade e de Emprego da Xunta, integra actuacións sobre alimentación saudable, actividade física, sedentarismo, exceso de peso e benestar emocional. Incorpora unha visión de ciclo vital e busca crear condicións que permitan ás persoas manter estilos de vida saudables.
O ámbito laboral convértese así nun espazo estratéxico para a promoción da saúde pública, servindo como punto de partida para avanzar cara ao "adulto san" e facilitando que a opción saudable sexa a máis doada no día a día.
Esta liña de traballo está orientada por tres estratexias clave da Xunta: a Estratexia de Seguridade e Saúde no Traballo de Galicia (con horizonte 2027), o Plan Obesidade Zero Galicia (2022-2030), e a Estratexia Galega de Lactancia Materna (2026-2030).
