A iniciativa, impulsada por Cesuga en colaboración con PEFC Spain e Cadwork, busca pór en valor as posibilidades da madeira na arquitectura contemporánea. O prazo de presentación de candidaturas permanecerá aberto ata o vindeiro 30 de xuño.
O galardón, que nas súas edicións anteriores se coñecía como Premio Pino de Galicia, estrea denominación e amplía o seu ámbito xeográfico para incluír obras realizadas en España e Portugal entre maio de 2025 e maio de 2026. Preténdese recoñecer proxectos que destaquen pola súa calidade, innovación, sustentabilidade e durabilidade.
A organización subliña que o obxectivo é destacar o potencial da madeira para unha arquitectura contemporánea, eficiente e duradeira. A edición conta co apoio de PEFC Spain, entidade ligada á certificación forestal sostible, e Cadwork, especializada en solucións dixitais para o deseño e fabricación en madeira.
O certame contempla cinco categorías: obras novas con madeira estrutural ou expresiva determinante; reformas ou rehabilitacións onde a madeira sexa clave; proxectos de deseño de produto e pequena escala (mobiliario, instalacións); o Premio Cadwork á innovación en procesos dixitais; e o Premio Arquitectura en Madeira Sostible PEFC, para proxectos con certificación e trazabilidade da madeira.
