As actuacións, executadas pola empresa pública Seaga, céntranse na mellora de cortalumes mediante maquinaria pesada en terreos situados entre ambos os municipios. O obxectivo é intervir nunha superficie de 35 hectáreas cun investimento que rolda os 33.000 euros, coa previsión de finalizar as tarefas antes da chegada do verán.
Durante a visita, a representante autonómica destacou que estas infraestruturas son esenciais para crear descontinuidades de combustible no terreo, o que axuda a frear o avance das lapas. Ademais, lembrou que o persoal do distrito forestal realiza labores complementarios como a limpeza de depósitos de auga, rozas e mantemento de pistas.
“"A anticipación e a planificación son ferramentas fundamentais na loita contra os incendios, polo que resulta imprescindible actuar durante todo o ano na conservación e mellora destas infraestruturas forestais."
No que respecta á xestión da biomasa, a Consellería do Medio Rural mantén activo o convenio con Seaga para facilitar aos propietarios e concellos a limpeza das faixas secundarias próximas ás vivendas. O prazo para completar estas obrigas legais finaliza o vindeiro 31 de maio.
A nivel autonómico, a Xunta incrementou este ano o orzamento destinado á prevención nun 50%, acadando os 75,38 millóns de euros. Con esta partida, prevese actuar en preto de 34.000 hectáreas en toda Galicia mediante diversas accións silvícolas e de sensibilización.
