A delegada territorial da Xunta na Coruña, Belén do Campo, supervisou este luns as actuacións realizadas no camiño de acceso a Cornido, no concello de Carnota. Estas obras forman parte do Plan Camiña Rural 2025-2026, que tamén incluíu intervencións no camiño de acceso a Noutigos, con aglomerado en quente e tripla rega asfáltica.
O investimento da Xunta nestes traballos ascendeu a case 54.000 euros na convocatoria 2025-2026. Ademais, Carnota contará con outros case 54.000 euros para actuacións similares na convocatoria 2026-2027. No conxunto da provincia da Coruña, un total de 86 concellos recibiron achegas da Consellería de Medio Rural por máis de 2,8 millóns de euros na convocatoria 2025-2026.
Na comarca do Barbanza, dez municipios —Carnota, Boiro, Lousame, Mazaricos, Muros, Noia, Outes, O Porto do Son, Rianxo e Ribeira— beneficiáronse destas axudas, sumando un total de case 600.000 euros. Durante a visita, Belén do Campo anunciou unha nova orde de axudas para o período 2026-2027, dotada con preto de 19 millóns de euros en réxime de concorrencia non competitiva, cuxo prazo de solicitudes xa finalizou.
“"Os camiños rurais estruturan o territorio e resultan esenciais para a dinamización social e económica do rural."
A representante do Goberno galego, acompañada polo alcalde de Carnota, Juan Manuel Saborido, explicou que todos os concellos da comunidade poden optar a estas achegas. As subvencións están dirixidas a financiar a ampliación e mellora de camiños que forman parte da rede viaria de acceso a unha ou varias entidades de poboación, incluíndo vías internas e conexións entre lugares ou coa rede principal.
Desde 2016, e unha vez finalizadas as actuacións da convocatoria de 2025, teranse intervido en preto de 6.700 camiños en toda Galicia, cunha lonxitude aproximada de 5.200 quilómetros e un investimento acumulado que rolda os 156 millóns de euros, subliñou a delegada.
