A actuación, que terá lugar ás dez da noite, está promovida pola área de Cultura da Vicepresidencia da Deputación de Lugo e a Asociación para a Promoción Social dos Ferreiros de Riotorto. O seu obxectivo é ampliar a relevancia cultural e patrimonial da feira, destacando o labor de preparación que precede ás demostracións e obradoiros dos ferreiros durante a tarde do sábado.
O artista coruñés visitou recentemente a forxa de Agustín de Faustino, un dos ferreiros activos na localidade, onde puido coñecer de preto os detalles deste oficio tradicional e a súa historia en Riotorto. Durante a visita, compartíronse lembranzas sobre informantes do concello que Xabier Díaz coñeceu nas súas investigacións, como Daniel e Eugenio Fernández, coñecidos como os de Baltasar, ou sobre o tear de Elena Rodríguez, de Xudán (A Pontenova), quen elaborou as borlas dunha das súas primeiras gaitas.
“"Os oficios e traballos tradicionais están detrás de gran parte das cantigas e da música tradicional da que se nutren Xabier Díaz e Adufeiras de Salitre, así que estamos convencidas de que o concerto é a mellor forma de recibir a Feira do Ferro."
Este concerto forma parte da programación cultural que a área de Cultura da Deputación organiza por toda a provincia, en colaboración con asociacións e concellos. A iniciativa busca fomentar a presenza da música tradicional e dos artistas e bandas galegas en festivais, festas e celebracións populares.
Ademais de enriquecer a programación da Feira do Ferro, a área de Cultura da Vicepresidencia da Deputación tamén apoia o traballo de documentación sobre o oficio e a súa repercusión económica, social e cultural. Este labor foi realizado nos últimos anos pola Asociación de Promoción Social dos Ferreiros de Riotorto, que catalogou ferramentas e técnicas propias e investigou a orixe da tradición do ferro en Riotorto, especialmente nas coñecidas como 'ferrerías de monte'.
