A directora xeral de Xuventude, Lara Meneses, puxo en valor a presenza da campaña Modo Verán Activo na provincia de Lugo, que suma un total de 2.672 prazas. A súa visita ao campamento Aventura na montaña, en Becerreá, serviu para subliñar a importancia desta iniciativa.
A representante da Consellería de Cultura, Lingua e Xuventude sinalou que esta oferta non só axuda á conciliación familiar, senón que tamén proporciona á mocidade "iniciativas lúdicas e culturais de calidade" para crear "lazos e recordos" duradeiros. A Xunta de Galicia comprométese a seguir mellorando esta campaña, que este ano acadou a súa maior oferta histórica con 11.932 prazas a nivel autonómico.
En Becerreá, o campamento Aventura na montaña, celebrado nas instalacións do centro de formación e experimentación agroforestal, acolle a 175 rapaces en cinco quendas ata o 18 de agosto. As actividades inclúen concienciación contra o lume, descuberta de alta montaña, supervivencia, propostas deportivas, xogos e un rastrexo fotográfico polo municipio.
Posteriormente, Lara Meneses saudou aos participantes do campamento Adventure Camp no Centro Peares de Inmersión Lingüística, en Carballedo. Esta iniciativa, que conta con tres quendas e 180 prazas, ofrece actividades en inglés como xogos de educación ambiental, obradoiros de radio e cinema, técnicas de orientación e supervivencia, e rutas de interpretación ambiental.
A campaña Modo Verán Activo ofrece un total de 8.050 prazas en campamentos para mozos e mozas de 9 a 17 anos, distribuídas en 36 instalacións. Complementan esta oferta os minicampamentos Coñece Galicia (876 prazas), actividades de ocio educativo para maiores de 18 a 30 anos (160 prazas) e os campos de voluntariado (815 prazas), que se estenden a outras comunidades e ao estranxeiro.
Ademais, a Consellería de Cultura, Lingua e Xuventude pon a disposición das asociacións e entidades xuvenís as súas instalacións, sumando 1.270 prazas adicionais para o desenvolvemento de plans relacionados coa mocidade.
