As piscinas municipais de Castro de Ribeiras de Lea retoman a súa actividade hoxe, venres, a partir das 16.00 horas. O peche temporal, que se prolongou durante dous días, foi motivado pola aparición de feces nun dos vasos da instalación.
O Concello de Castro de Rei informou de que, unha vez completado o protocolo de limpeza e desinfección, as piscinas xa se atopan en condicións de salubridade. Agradeceron a colaboración e o entendemento dos usuarios durante o período de clausura e solicitaron responsabilidade para o mantemento axeitado das instalacións.
A decisión de pechar as piscinas tomouse o mércores ao mediodía tras detectarse a presenza de excrementos. O alcalde sinalou que se localizaron no vaso pequeno, conectado ao grande, e que se descoñecía se o incidente fora intencionado ou accidental. Inicialmente, non se descartaba que o peche puidese prolongarse ata o sábado.
Este incidente non é o único rexistrado na provincia de Lugo este verán. Outras piscinas municipais, como as de Castroverde, Friol e Guitiriz, tamén tiveron que ser pechadas temporalmente polo mesmo motivo. O ano pasado, o denominado 'reto marrón' viralizouse, provocando peches similares noutras localidades do país.
