A asociación cultural Lugo Sur Conturiz, que se achega aos seis meses de existencia, continúa fortalecendo a súa xunta directiva coa chegada de recoñecidos profesionais. Nesta ocasión, incorpórase Rafael Monte, xefe de Medicina Interna do Hospital Universitario Lucus Augusti (Hula) e director asistencial que foi da área sanitaria de Lugo, A Mariña e Monforte de Lemos. Monte tamén é docente na Escola Universitaria de Enfermería no Campus Terra da USC.
Xunto a Rafael Monte, tamén se unen á directiva o escritor e xornalista Xulio Xiz, o fotógrafo Serafín Trashorras e o empresario hostaleiro Armando Méndez, coñecido pola súa vinculación á asociación Cociñeiros Lugo e como copropietario da arrocería Os Cachivaches.
Estas novas incorporacións súmanse a membros xa presentes na directiva como a oncóloga Begoña Campos, o portavoz da Sociedade Española de Médicos de Familia, Lorenzo Arementeros, o urólogo Neira Pampín, o piloto de automobilismo José Alonso Liste e o escritor Jordi Cicely.
A entidade, presidida polo licenciado en Dereito Carlos Vázquez Pena, reitera o seu "firme propósito de dinamizar a sociedade lucense con ambiciosos proxectos de divulgación cultural, sanitaria e social". A directiva busca dar un "salto cualitativo" para converterse nun referente asociativo en Lugo, promovendo actividades de interese xeral abertas a toda a cidadanía.
Como parte das súas actividades, o vindeiro luns 29, ás 20:30 horas no local social de Conturiz, o enfermeiro e directivo da asociación Marcos Folgueira ofrecerá unha conferencia titulada 'Feridas e úlceras; prevención, coidados e sinais de alarma'.
