O intenso programa da xornada dominical desenvolveuse segundo o previsto, atraendo a unha multitude de público que seguiu con grande interese as diversas propostas. Desde primeira hora da mañá, os campamentos castrexos e romanos, o mercado e as actividades divulgativas encheron de vida o paseo fluvial, a Avenida de Santiago e a Praza de Andón Cebreiro.
Talleres artesanais, demostracións de antigos oficios, xogos populares, música tradicional e propostas gastronómicas mantiveron o ambiente festivo durante todo o día. Esta edición xa é a máis multitudinaria das celebradas ata o momento, superando as previsións iniciais.
O evento, organizado pola asociación A Castronela e o Concello de Friol co apoio da Xunta, contou coa participación de 34 asociacións procedentes de distintos puntos de Galicia e doutras comunidades como Asturias ou Navarra, reunindo un total de 589 figurantes. Esta cifra confirma o crecemento constante dunha celebración que, en só oito edicións, se converteu nun referente dentro das recreacións galegas.
“"Cada ano hai máis participación e máis implicación de todo o pobo, e iso é o que fai grande o Friulio."
Un dos momentos máis emotivos da xornada dominical foi o nomeamento do exdirector do CPI de Friol como Persoeiro de Honra desta edición. Tamén se entregaron os premios á mellor decoración de escaparates e fachadas, e houbo animación musical a cargo de Tympana Gallaica, Son de Lugh e Xesta Verde.
O Concello de Friol xa está a pensar na próxima edición, co obxectivo de seguir crecendo e consolidando o Friulio como unha das grandes citas de recreación histórica de Galicia. A meta é que a festa siga sendo aberta a todo o mundo, coas portas abertas para todas as asociacións.
