O obxectivo deste novo sistema é realizar inspeccións, medicións e comprobacións sobre o funcionamento dos servizos, verificar o cumprimento das condicións do contrato e prestar asistencia técnica ao Concello para determinar posibles deducións ou penalidades por incumprimentos. Búscase obter información obxectiva e criterios técnicos para avaliar a calidade do servizo e esixir que se preste nas condicións contratadas.
Este control externo xa estaba previsto no contrato principal de limpeza e recollida de residuos desde a súa adxudicación o 1 de agosto de 2022. A empresa concesionaria, a UTE formada por COPASA, GESECO e SETEC BUILDING (Ecolugo), comprometérase a achegar anualmente ao Concello o 1% do valor anual do contrato para financiar este mecanismo de supervisión. Porén, o informe de Intervención sinala que non constan na contabilidade municipal os ingresos das tres primeiras anualidades (389.454,85 euros) nin se esixiron os pagamentos á empresa.
A contratación tramitarase mediante procedemento aberto, suxeito a regulación harmonizada, coa publicación correspondente no Diario Oficial da Unión Europea e na Plataforma de Contratación do Sector Público.
Ademais, a Xunta de Goberno Local aprobou a cobertura temporal, mediante comisión de servizos, do posto de adxunta do Servizo de Xestión Urbanística. A praza, vacante temporalmente, será cuberta por unha funcionaria municipal adscrita a Urbanismo por un máximo dun ano, prorrogable por outro.
Tamén se aprobou a ampliación do contrato de conservación e mantemento dos campos municipais de fútbol e béisbol para incorporar as instalacións de herba artificial As Gándaras I e II. A modificación supón un incremento anual de 13.697,20 euros e busca garantir o bo estado das instalacións.
Finalmente, modificouse a base do Orzamento municipal de 2026 relativa a unha subvención de 19.000 euros para servizos de interpretación en lingua de signos e mantemento do local social. Substitúese ALUSOR por ASORLU como entidade beneficiaria, xa que esta última si prestou o servizo de intérprete de lingua de signos durante 2026.
