A rexedora, Elena Candia, avanzou que entre os plans do goberno local está a apertura dunha oficina na zona centro co obxectivo de axudar aos veciños a tramitar as axudas para a rehabilitación de vivendas e edificios.
Tras a aprobación da área de rehabilitación integral (Ari) por parte da Xunta, o Concello comezará a traballar nas bases das axudas. Espérase que estas bases estean listas entre agosto e setembro, coincidindo coa previsión da sinatura do acordo do plan de vivenda entre o Estado e a Xunta, momento a partir do cal se poderán solicitar as subvencións.
Candia considerou que estes pasos efectivos chegan despois de sete anuncios sen contido por parte dos anteriores gobernos locais, realizados en periodos electorais. A alcaldesa sinalou que agora se facilitará a recuperación de inmobles en zonas da cidade con "moitas oportunidades".
Os fondos para rehabilitación poderanse solicitar cando o diñeiro do plan estatal de vivenda chegue á Xunta. Segundo Candia, cos "deberes feitos", os veciños poderán recuperar os seus inmobles nestes barrios.
