A iniciativa busca tender pontes entre a tradición artesanal e as novas tendencias innovadoras, reunindo a 24 creadoras e creadores da provincia de Lugo. A maioría dos participantes xa contan cunha traxectoria consolidada no sector.
Na presentación do evento, celebrada na mesma Praza Maior, participaron autoridades como Roberto Bande, vicerreitor de coordinación do Campus; Marta Miranda, directora do Campus Terra; Javier Arias, delegado da Xunta; Miguel Fernández, deputado provincial de Economía e Coñecemento, e Cristina Sanz, concelleira de Dinamización Económica. Todos eles subliñaron a importancia da feira como "un espazo de encontro e colaboración entre persoas emprendedoras, creadoras, investigadoras e profesionais comprometidas co desenvolvemento sostible e o progreso do rural galego".
Os organizadores destacaron que esta feira pon en valor a investigación ligada á tradición e ao patrimonio, ao tempo que fomenta a profesionalización das artesás e busca asegurar o relevo xeracional no sector.
O programa do día 30 de maio inclúe mesas redondas como "Xuntas innovamos: cooperación e futuro na artesanía", coa participación de representantes de asociacións de redeiras, cooperativas creativas e artesáns. Outra mesa abordará a "Artesanía circular e con propósito: posicionamento e potencial de vendas", con emprendedoras que traballan con materiais reciclados, cristal, redes de pesca recuperadas e madeira.
Ademais das mesas redondas, haberá unha zona gastro con 'Coffe Stand' e 'Sesión Vermú' con música a cargo de DJ KRon. Tamén se impartirá un obradoiro de tecelaxe coa técnica de felpado ou gorullo, dirixido por Miriam Fernández, historiadora da arte e artesá téxtil.
As casetas de artesanía ofrecerán unha ampla variedade de produtos, dende artigos de coiro, xoias e cerámica, ata complementos de lá, moda e decoración, a cargo de proxectos como Bolboretas de Coiro, Iria Pigueiras, Tecelana, Tres Caracoles, Pura Garra, Lanatalum, A Linda Landra, Ceniza de Papel, Maria Jul, Péndulo, Margarita Portomeñe, Crystalinda, Belitroque, Fonte Meimil, Pía Piadosa, TdeTete, Obradoiro Driades, CaponeTheDog, Xurumbelas, Manos Inkietas, Viva la Pepa, Una2Vida, Corazón Artesans Lugo e Ohana.
